«Йөрмә кызыктырып» – Фирдүс Тямаев Рузилә Хәйретдинованы гастрольләргә чакырган

Җырчы Фирдүс Тямаев төркемендә яңа җырчы барлыкка килергә мөмкин. Күбрәк шәхси бизнесы белән шөгыльләнеп, хәзер сәхнәләрдә сирәк күренүче Рузилә Хәйретдинованың яңа образын күреп, Фирдүс Тямаев аны үзе белән гастрольләрдә йөрергә чакырган.

Рузилә халыкны үзенең тышкы кыяфәте, матур, вакыт-вакыт артык ачык та булган киемнәре белән җәлеп итәргә ярата. Бу юлы да ул социаль челтәрләрдә үзенең шактый кыю образын күрсәтте. Аның өстендә кып-кыска ак күлмәк, аягында озын кара сапоги, башында кара косынка.

Бу видео янында беренче комментарийны Фирдүс Тямаев калдырган. Алда әйтүебезчә, ул аны үзенең концертларында чыгыш ясарга чакыра. «Син давай кү...ңне күрсәтеп йөрмә, кызыктырып. Минем белән гастрольләргә чык», – дип язып калдырган Фирдүс Рузиләгә.

Калган комментарийлар да Рузиләгә мактау сүзләре буларак яңгырый. «Анда берәрсе янгын сүндерүчеләрне чакырмадымы әле?»; «Сине танырлык түгел, искиткеч чибәр»; «Үләм, что за бомбито?»; «Бигрәк матурсың», – дигәннәр җырчыга.

Ә сезгә нәрсә уйлыйсыз Рузилә Азатовнаның яңа образы турында?