Җырчы Ришат Төхвәтуллин туган авылы Карамалы-Гобәйгә кайтып бәрәңге утырткан. Гастрольдән-гастрольгә йөреп, мәшәкатьле артист тормышы белән яшәп, Ришатның инде 7 ел бакча эшләренә катнашканы булмаган икән.
«Бәрәңге утыртмаганыма җиде ел. Ә бәрәңгесен бик яратам», - дип язып куйган җырчы телеграм каналына.
Шактый вакыт узса да, көрәкне ничек тотасын онытмаган тагын үзе. Ап-ак футболкасы белән ап-ак кепкасын киеп алган да, бакчага чыккан. Әти-әнисе белән ә дигәнче утыртып та куйганнар, үзе әйтмешли Карамалы-Гобәйдәге иң тәмле бәрәңгене.
Ришат туган авылына музыканты Мердан Бяшимов белән кайткан булган. Әмма Мерданны уятып тормаганнар, концерт алдыннан (бүген Ришат Төхвәтуллин Азнакайдагы Җиңү бәйрәмендә чыгыш ясый) ял итсен дигәннәр ахры, башкалар бакча казыганда, музыкант йокы туйдырган.
«Җиңү көне хөрмәтенә кулга көрәк алдым мин. Без бу көннәрдә Башкортстанда, кемгә бәрәңге утыртышырга кирәк, эндәшегез. Килү-китү бушка, утыртуын әйтә алмыйм», - дип тә шаярткан җырчы.
Телеграм каналын укып баручылар арасында Ришатны өмәгә дәшүчеләр бар инде. «Безгә килеп китегез әле. Әмма сез бәрәңге утыртырга килсәгез, халык эштән туктап, сезнең белән фотога төшә башлар иде», - дигән комментарийлар бар.