Инстачылар Ренат Галиәскәргә: «Күке оя кормас, тиле гаилә кормас»
Инстадуслары алып баручы, җырлар авторы Ренат Галәскәргә гаиләле тормышның яхшырак булуын дәлилләргә тырышканнар.
Ренат Галиәскәр үзенең инстаграм сәхифәсенә: «Өйләнмәгән егетнең башында, өйләнгәннең кесәсендә җил уйный. Өйләнмәгән егет үзе белеп эшли, ә өйләнгәнне хатыны кушып эшләтә. Хатын авызыннан: „hәр ир-ат“ дип чыккан җөмлә „тиеш“ сүзе белән тәмамлана. Ә сез өйлән дисез!» — дип язган.
«Бармы ул гаилә тормышы турында берәр позитив мәкаль-әйтем, ә?” - дип сораган ул инстачылардан.
«Ир яхшы булса, ямьсез хатынга да тәм керә»;
«Ирле хатын Идел кичәр, ирсез хатын акыра-бакыра калыр»;
«Өйләнмәгән өйсез булыр, тормышы көйсез булыр»;
«Күке оя кормас, тиле гаилә кормас»;
«Ир өйнең бер чатын тотып торса, хатын өч чатын тотып торыр», — дип гаиләле булуның уңай якларын күрсәтүче мәкальләрне санап киткәннәр алып баручының инстадуслары.
«Ренат, барысы да синең кулыңда. Үзең нинди булсаң — хатының да шундый булыр»;
«Болай күп уйласаң, өйләнә алмыйсың, Ренат. Сайлаган сазга, очраган тазга», — дип тә комментарийлар калдырганнар.
Ә бер инстачы Ренатка, гомумән, өйләнмәскә киңәш иткән. «Өйләнмә, энем. Хәзер юньле кызлар табуы авыр. Бәлки бардыр алар. Эзләргә кирәк. Белмим, таба алырсыңмы икән? Иң яхшысы — бөтенләй өйләнмә, иза чикмә», — дип язган ул.