Инстачылар: «Дөньядагы вәзгыять белән бөтен артист пешекчегә әйләнеп бетте»
Илсур Шәрипҗанов колбаса ясап сатуга керешмәкче була. Тавык колбасасы рецептын җырчы инстаграмдагы язылучыларына да язган.
«Кичә беренче тапкыр тавык рулеты ясап карадык әле. Шәп килеп чыга икән», — дигән җырчы Илсур Шәрипҗанов инстаграмдагы аккаунтында. Бик тәфсилләп рулетны әзерләү рецептын да тәкъдим иткән.
«Рецепт: 1 тавыкны, тиресен кисмичә генә, сөякләреннән аерабыз да, тактага җәеп салабыз. Түш тирәсендәге калын өлешләрен, итсез, юкарак өлешләренә бертигез калынлыкта җәеп чыгабыз. Шунан тоз, борыч, паприка, вакланган розмарин, хмели-сунели тәмләткечен көнбагыш мае белән кечкенә савытта болгатып, 4-5 тырнак сарымсакны вак итеп турап, тавык өстенә сылыйбыз. Аннары ролл кебек бөтереп, рулет ясыйбыз. Бер чәй кашыгы паприканы 1 аш кашыгы май белән болгатып, пумала белән рулетның өстен буяп куябыз. Килеп чыккан рулетны пешерү пакетына салып, тыгыз итеп торәбез. Баш-башларын кәнфит ясаган кебек бөреп куябыз. 30 минутка суыткычка куеп торабыз. Табага салып, 180 градуслы мичтә 1 сәгать пешерәбез. Пешеп чыккач, бүлмә температурасында суытып, 3-4 сәгатькә суыткычка куеп торабыз. Рулет әзер! Ашларыгыз тәмле булсын».
«Молодец, брат, тәмле булгандыр. Дөньядагы бу вәзгыять әллә нинди яшерен талантларны ача», — дип язган аңа дусты Илдар Шәрәпов. «Шулай брат, колбаса ясап сата башларга микән дип торам инде», — дигән Илсур.
«Бу тормыштагы вәзгыять белән бөтен артист пешекчегә әйләнеп бетте», — дигән берәүгә: «Илсур һәрвакыт пешерде һәм пешерә», — дип җавап кайтарган җырчының тормыш иптәше Гөлназ, ирен яклап.