Инстачы Илсөя Бәдретдиновага: «Бозаудан үгез ясау сездән тора инде»
Җырчы виртуаль дуслары белән сөйләшкән.
Илсөя Бәдретдинова матур вә серле, ятып төшкән фотоларын инстаграм сәхифәсенә куйган да: «Киви ашыйсым килә, лимон, гранат һәм тозлы әйберләр… Организмга нидер җитми, да? Йокламагыз, сөйләшик әле», — дип язган.
Инстачыларга шул гына кирәк тә инде, киңәшсез калдырмаганнар.
«Ятып торыгыз, бәлки узар»;
«Әтисе кем? Бизнесмен, продюсер, тәкъдим ясаган абый?»;
«Бу кадәр эшләвеңә синең, әллә нәрсә дә ашыйсың килер»;
«Кияүдә булдың инде, улың бар, тәҗрибәң бар, хәзер үзеңне ярат инде»;
«Миңа кунакка кайтыгыз әле, итле, балыклы әйберләр ашарбыз»; — дигән комментарийлар калдырганнар.
«Илсөя, сез, ниһаять, өлгереп беттегез, сезне өзеп алучы гына кирәк», — дип язучы белән җырчы арасында диалог булган.
«Бозаулар килә дә карап тора», — дип язган җырчы.
«Бозаудан үгез ясау сездән тора инде», — дигән инстачы.
«Ясап туйдырды, әзерләре булмыймыни аның?» — дип язган җырчы.
«Булгалый, әмма алар музейдагы экспонатлар шикелле берәр генә экземпляр була», — дигән комментарий белән диалог тәмамланган.