«Хозур дин турында» телеграм-каналында мөселманнарның ни өчен «Иннә лиЛләһи үә иннә иләйһи раҗигун» дип әйтүен аңлаталар.
«Игътибар иткәнегез бардыр: мөселманнар, нинди дә булса кайгы, сынау килгәндә, югалтулар вакытында «Иннә лиЛләһи үә иннә иләйһи раҗигун» диләр. Ни өчен нәкъ менә шул сүзләрне кулланабыз соң, дип уйланганыгыз бармы? Барысы да бик гади», – диелә хәбәрдә.
Әлеге сүзләрнең мәгънәсе мондый: «Иннә лиЛләһи» – «Чынлыкта, без Аллаһыдан килдек» «үә иннә иләйһи раҗигун» – «һәм яңадан Аңа кайтачакбыз». Бу сүзләр безгә гомеребезнең вакытлыча гына булуын, һәм ахырда барыбызның да Аллаһыга хисап өчен кайтуыбызны искә төшерә. Бу сүзләр – ихластан Аллаһыга ышанып тапшыру – тәвәккәллек һәм сабырлык билгесе, дип язылган әлеге текстта.
