ИНН алу өчен нишләргә?
Электрон гариза биргән очракта ИННны икенче көнне үк алырга була.
Хәзер Россиядә физик затлар ИННны нибары бер көн эчендә ала алачак. Бу хакта Федераль салым хезмәтенә сылтама белән РИА Новости яза.
«Физик затларны салым органнарында учетка кую бер көнгә кадәр кыскартылды. Мондый тизәйтелгән алымны „Россия Федерациясендә физик затны салым органына учетка кую турында гариза бирү“ сервисы аша кулланырга була. Электрон гариза биргәннән соң икенче көнне үк таныклыкны алу өчен салым органына чакыру киләчәк», — диелә хәбәрдә.
Салым хезмәтендә әйтүләренчә, ИНН алу өчен салым инспекциясенә шәхсән мөрәҗәгать иткәндә, учетка кую һәм таныклыкны тапшыру биш көннән дә озакка сузылмый.