Казанда яшәүче хатынның борыныннан тараканга охшаган бөҗәк алганнар | intertat.tatar

Казанда яшәүче хатынның борыныннан тараканга охшаган бөҗәк алганнар

Табиблар сүзләренчә, әлеге чит предмет борын куышлыгында күпме ятканын ачыклап булмый.

Казанда яшәүче 31 яшьлек хатынга 18нче номерлы хастаханәдә операция ясаганнар. Табиблар аның борыныннан тараканга охшаган бөҗәк алган. Бу турыда Казандагы 18 нче номерлы шәһәр хастаханәсенең инстаграмдагы сәхифәсендә хәбәр ителә.

Бу хатын борыны белән сулыш ала алмавына зарланып, табибларга мөрәҗәгать итә. Аның баш миенә томография ясагач, борын куышлыгында чит предмет булуы ачыклана. Шәһәр клиник хастаханәсенең оториноларингология бүлегендә — оториноларинголог, ЛОР- бүлеге җитәкчесе Руслан Мөхәммәдиев һәм анестезиолог Айдар Нәҗипов бу хатынга операция ясаган. Операция наркоз астында эшләнгән.  

«Башта бу предмет орлыкка охшаган иде. Операция вакытында аның бөҗәк булуы ачыкланды. Аның борын куышлыгында күпме торуын билгеләп булмый инде», — дип сөйли Руслан Мөхәммәдиев.

Алынган материалны гистологиягә җибәргәннәр. Авыру хатын исә бу хәлгә бик гаҗәпләнгән. 2019 декабрендә аның борыны тыгыла башлый. Ул борынында шундый әйбер булыр дип башына китермәгән, борында бөҗәк булуын аңламаган да. 

Хатын белгечләргә мөрәҗәгать итмәгән булса, анда флегмона, менингит кебек куркыныч авырулар килеп чыгу ихтималы була. Хәзерге вакытта пациент үзен яхшы хис итә.⠀

Кызганычка каршы, ЛОР-табиблар кешенең борынында һәм колагында чит предметлар булган очраклар белән еш очраша. Аеруча бу балалар белән була торган хәл. «Әгәр дә сез шундый ук симптомнар кичерсәгез (борын белән сулыш алу кыенлашса), колакка һәм борынга бөҗәкләр кереп китсә, оториноларингологка вакытында мөрәҗәгать итү яхшырак», — дип киңәш итә табиб.