Коронавируслы авырулар дәваланган хастаханәнең баш табибында коронавирус табылган
Үз кабинетымда изоляцияләндем, дип яза Коммунарка хастаханәсе баш табибы.
Мәскәү шәһәренең 40нчы клиник хастаханәсенең баш табибы Денис Проценкода коронавирус инфекциясе булуы ачыкланган. Бу турыда РИА Новости агентлыгы яза.
“Дуслар! Сезнең борчылуыгызны белгәч, күңелем булды. Әйе, минем CoVга тестым уңай. Мин үземне яхшы хис итәм. Үз кабинетымда изоляцияләндем. Биредә дистанцион эшләү, идарә итү һәм телемедицина консультацияләре өчен барлык мөмкинлекләр бар”, - дип яза ул Фейсбук челтәрендә.
Узган атнада Коммунаркадагы бу клиникага Россия Президенты Владимир Путин килгән иде. Ул Проценко белән очрашып аралашты.
Дүләт башлыгының матбугат сәркатибе Дмитрий Песков бар да яхшы булуын, Президентны дами рәвештә коронавируска тикшереп торуларын әйтте, диелә бу хәбәрдә.
Яңа коронавирус дөньядагы 200ләп илдә ачыкланды. Вирус йоктыруның барлыгы 840 мең чамасы очрагы теркәлгән. 33 меңнән артык кеше үлде. Россиядә авыручылар саны 2337 кеше, аларның 1613е Мәскәүдә, 121 кеше терелде, 17 кеше үлде. Бу белешмә стопкоронавирус.рф. сайтында күрсәтелгән.