Татарстанда янгын вакытында 360 сыерны коткарганнар

Ферма түбәсе яна башлагач, терлекләрне эвакуацияләгәннәр.

Татарстанда сыер фермасының түбәсе яна башлагач, 360 сыерны коткарганнар. Бу турыда «Татар-информ» агентлыгына Татарстан буенча Гадәттән тыш хәлләр министрлыгының матбугат хезмәтендә хәбәр иттеләр.

27 майда Яшел Үзән районында урнашкан «Азелеевское» терлекчелек комплексының бер корпусының түбәсенә ут каба. Ашыгыч ярдәм хезмәтләрен чакыра торган 112 номерына шул хакта хәбәр килә.

Урынга «Норлат», «Борындык», «Татар Танае» янгын сүндерү отрядлары бара. Алар түбәдә җылыткыч материал пыскып януын ачыклый.

Янгын сүндерүчеләр тиз арада 360 баш сыерны чыгаралар.

120 квадрат метр мәйданда янгын була. Аның сәбәпләрен белгечләр ачыклаячак.