Камыр баса торган җайланмага кысылган кыз иңбашыннан кулсыз калган
27 яшьлек хатын-кыз үзенең саксызлыгы аркасында имгәнгән булуы ихтимал.
Алтай өлкәсенең Бийск шәһәрендә пекарняда эшләүче 27 яшьлек хатын-кызның кулы камыр баса торган җайланмага кысылып калган. Аны коткару эшләрен видеога төшереп алганнар. Бу кадрларны «Вести» каналы күрсәтте.
22 мартта имгәнгән пекарня хезмәткәрен коткару өчен җайланманы бөтенләй сүтәргә туры килгән.
Якынча версия буенча, 22 мартта иртәнге сигезләр тирәсендә 27 яшьлек хатын-кыз камыр баса торган җайланмага кулын тыга. Бу хатын үзенең саксызлыгы аркасында имгәнгән булуы ихтимал, диелә хәбәрдә.
Коткаручылар аппаратны тулысынча диярлек сүткәч кенә, хатынның кулын механизм эченнән тартып чыгара алган.
27 яшьлек кызның кулын табиблар саклап кала алмаган. Имгәнгән уң кулны иңбашыннан диярлек ампутацияләргә туры килгән. Хәзерге вакытта бу хатын хастаханәдә ята, аның гомеренә куркыныч янамый.
Алтай өлкәсе буенча Тикшерү идарәсе тикшерү эшләре башлаган. Алар предприятиедә иминлек кагыйдәләре үтәлешен тикшерә.