Төмән урманында аюны җиңгән егетне ясалма комага җибәргәннәр
Боксчы егетне аю шактый имгәткән.
Боксчы Илья Медведев Төмән урманында аю белән көрәшергә мәҗбүр була. Хәзер яраланган егетне ясалма комага җибәргәннәр. Бу турыда «Комсомольская правда» үз чыганагына сылтама белән хәбәр итте.
Төмән өлкәсенең бокс федерациясе 23 яшьлек Ильяга тизрәк сәламәтләнү тели. Илья Медведев төбәкнең җыелма командасына керә, ул Россиянең спорт мастеры. «Илья җитди травмалар алган, бәхеткә, аның гомеренә куркыныч янамый. Хәзер ул Төмән хастаханәсендә. Спортчының әти-әнисенә сабырлык һәм көч телибез», — ди алар.
20 октябрьдә өч ир-ат Уват районындагы урманга йөрергә бара. Аларга көтмәгәндә генә аю һөҗүм итә. 48 яшьлек ир-ат шунда ук һәлак була. Илья исә ерткыч белән көрәшә, аңа берничә тапкыр пычак кадый.
Соңрак ачыкланганча, ир-атларның мылтыгы була, тик ул теркәлмәгән, аю өне янында гильзалар да табыла. Биредә яшәүчеләр ир-атлар аюга үзләре башлап һөҗүм иткәндер дип фаразлый, диелә хәбәрдә.