Зәйдәге коточкыч юл һәлакәте өчен автобус йөртүчене 7 елга ирегеннән мәхрүм итәргә җыеналар | intertat.tatar

Зәйдәге коточкыч юл һәлакәте өчен автобус йөртүчене 7 елга ирегеннән мәхрүм итәргә җыеналар

Зәй шәһәр суды юл һәлакәтенә юлыккан автобус йөртүче Александр Ижмуковка карата суд-тикшерү эшен тәмамлады.

Әлеге юл фаҗигасендә 14 кешенең гомере өзелгән иде.

Ижмуков кулга алынган, аны "Юл хәрәкәте һәм транспорт чарасын куллану кагыйдәләрен бозу” маддәсе буенча хөкем итәләр. Аны 7 елга кадәр ирегеннән мәхрүм итәргә мөмкиннәр, дип хәбәр итә "Татар-информ" агентлыгы.

Исегезгә төшерәбез, 2 июль төнендә Зәй районында Чаллы – Әлмәт трассасының 52 нче чакрымында 28 пассажир утырган автобус юл һәлакәтенә эләккән. «Неоплан» автобусы йөртүчесе юл һәм һава шартларын исәпкә алмаган, тизлекне арттырган. Аннары бер юнәлештә баручы “МАН” йөк машинасы белән бәрелешкән. Бәрелешүдән автобуска ут капкан һәм әйләнгән.

Чираттагы суд утырышы 7 февральдә узачак.

Фаҗига хроникасын биредә укый аласыз.