Башкортстанда аю һөҗүм иткән ир-ат реанимациядә ята | intertat.tatar

Башкортстанда аю һөҗүм иткән ир-ат реанимациядә ята

Ике ир-ат юлда туктап, ерткычны якыннанрак карамакчы булган.

Башкортстанның Караидел районында 22 апрельдә бер ир-атка аю һөҗүм иткән. Бу турыда «Башинформ» хәбәр итте.

Якынча белешмә буенча, транспорт компаниясендә эшләүче ике ир-ат Нәһретдин авылына таба бара. Юлда алар аю очрата. Ир-атлар машинадан чыгып, кыргый ерткычны карамакчы була.

Бер мизгелдә аю ир-атлар янына килә. Ул бер ир-атка ташлана. Икенче ир-ат монтировка ярдәмендә, каты итеп кычкыра-кычкыра, ерткычны куып җибәрә.

Башкортстан буенча Сәламәтлек саклау министрлыгы хәбәр иткәнчә, аю һөҗүм иткән ир-ат яраланган, аны Уфа хастаханәсенә китергәннәр.

«Пациент реанимациядә ята. Ул үз аңында. Хәле стабиль катлаулы дип бәяләнә», — дип сөйләгән Сәламәтлек саклау министрлыгының матбугат хезмәте җитәкчесе Софья Алешина.

Ир-атның тәнендә ертылган яралар күп, балтыр сөяге сынган, диелә бу хәбәрдә.