«Күңелсез, берәрсен үтерәсе иде»: Үсмерләр кызык өчен дус кызларын вәхшиләрчә үтергән

Тыныч һәм тыйнак кына Вераның битен пыяла белән кискәләп бетергәннәр, башына полиэтилен кидереп җәзалаганнар.

Архангельск шәһәрендә 17 яшьлек ике кыз кеше үтерүдә шикләнелә. Алар «күңелсез булганга» бер яшьтәш кызларының гомерен өзә. Коточкыч җинаять 29 июньдә Партизан урамында тимер юллар янында була. 17 яшьлек Вераның (балигъ булмаганнарның барысын да исемнәре үзгәртелә) мәетен июнь азагында Архангельск читендә тимер юл янында табалар. Кызның бите пыяла кыйпылчыгы белән кискәләнгән, муенында буылган эзләр була. Шәһәр халкы маньяк барлыкка килгән дип куркуга кала. Берничә көннән Вераның элеккеге сыйныфташлары Кира белән Кристинаны тоткарлыйлар.

Үтерүдә гаепләнүче кызлар һәм мәрхүмә кечкенәдән аралашып үсә, алар дуслар була. Бу турыда «Московский комсомолец» хәбәр итте.

Җинаять вакытында кызларга унлатышар яшь була. Алар җинаять планын интернетта әзерли. Хат язышканда үтерү коралын, мәетне кая яшерәсен сөйләшәләр. Үтерергә барганда, үзләре белән резин перчаткалар, чистарта торган сыеклыклар алалар. Җинаять кылганнан урыннан тыныч кына китеп баралар. Бу турында РИА Новости хәбәр итте.

20 декабрьдә кызларга гаепләү белдерелде. «Берничә кеше җыелып, аеруча вәхши ысул белән үтергән өчен» аларны егерме елга кадәр төрмәгә утыртулары ихтимал.

«Тикшерү версиясе буенча, гаепләнүче кызлар 2019 елның июнендә бергә очрашкач, телефоннан аралашканда, хатлар язышканда, кеше үтерергә карар кыла. Алар корбан сайлый, үтерү урынын һәм ысулын килешәләр, җинаять эзләрен яшерү турында уйлашалар. Алар 17 яшьлек таныш кызларын корбан итеп сайлый. Аңа очрашырга тәкъдим итәләр. 29 июньдә очрашуга баралар. Үзләре белән резина перчатка, полимер пакетлар, чистарту чарасы алып баралар. Алдан әзерләнгән план буенча, алар корбаннарына һөҗүм итәләр, шешә белән башына бәрәләр. Кыз җиргә егыла. Аннары аны каеш белән буалар, пыяла шешәләр белән кыйныйлар, пыяла ватыклары белән яралыйлар, башына пакет кидерәләр. Шуннан соң бу кызлар җинаять урыныннан кача», диелә Россия Тикшерү комитетының Архангельск өлкәсе һәм НАО буенча Тикшерү идарәсенең хәбәрендә.

Башта кызлар мәрхүмә белән талаштык дип әйтә. «Ләкин кызларның гаджетларын укыгач, андый мотив булмавы ачыклана. Сүзен-сүзгә әйтә алмыйм, тик аралашу мәгънәсе мондыйрак: „тормыш күңелсез, берәрсен үтерергә ахрысы“. Аларның корбаны кем булса да ярый, алар кемнедер үтерергә тели. Шуңа күрә бу ике кызга „хулиганлык аркасында кеше үтерү“ маддәсе буенча гаепләү белдерелә», — дип сөйли РИА Новости агентлыгының тикшерүдәге чыганагы.

Кызлар Вераны урамга йөрергә чакыра. Үзләре белән буш пыяла шешә, резина перчатка, чистарта торган эремә алалар. «Алдан уйланган план буенча, кызларның берсе корбанның башына шешә белән суга. Вера аңын югалта. Аның башына полиэтилен пакет кидерәләр, битен пыяла белән кискәлиләр», — дип сөйли төбәк буенча Тикшерү идарәсе җитәкчесенең өлкән Светлана Тарнаева.

Вера үлгәч, үтерүчеләр бу урыннан тыныч кына китеп бара. Аларны берничә көннән тоткарлыйлар. «Кызларның берсе гаебен шунда ук таныды, икенчесе күрсәтмәләрен берничә тапкыр үзгәртте. Гаебен өлешчә генә таныды», — ди агентлык чыганагы.

Кира һәм Кристина сыйныфташлар. Тугызынчыны бетергәч, берсе көллияткә китә, тик аралашуны дәвам итәләр. Кызларның танышлары фикеренчә, барысын да Кристина планлаштырган, ә Кира аңа ярдәм иткән булуы ихтимал.

Тикшерү комитетында хәбәр иткәнчә, кызлар икесе дә яхшы гаиләдән. Элеккеге сыйныфташлары гына Кристинаны агрессив дип бәяли. «Үчекләгән өчен, бер малайны кыйнап ташлады. Нык түгел, тик шулай да егетләргә кул күтәрә ала», — ди танышлары.

Вераны барысы да яхшы кыз дип искә ала. Ул тыйнак һәм тыныч булган. Үзенең үтерүчеләре белән башлангычта бергә укыган. Тугызынчы сыйныфтан соң көллияткә киткән, тәрбияче булырга теләгән.

«Соңгы вакытта ул матурайды, чәчен кистерде, киемнәре матур иде. Кира белән Кристина шуны ошатмагандыр. Корбан итеп нәкъ менә Вераны очраклы гына сайлаганнарына ышанучылар аз», — дип сөйли Вераның танышы.

Башта конфликт берәр егет аркасында булган дип уйлыйлар. Тик тикшерүчеләр моны кире кага. Үтерү алдыннан конфликт булмаган. Бу кызны очраклы сайлап алганнар, дигән РИА Новостиның тикшерүдәге чыганагы.

Вераны эзләгән вакытта, Кира белән Кристина тыныч кына лекцияләргә йөри, бу хәлгә шаккаткан кебек кыланалар. «Бер танышым Кира белән Кристинадан Вераны күрмәдегезме дип сораган иде. Алар күптән аралашканыбыз юк дип ялганлаган», — дип сөйли бер кыз.

Үтерүче кызлар Вераны җирләргә дә барган, дигән гайбәт тарала. Тик бу уйдырмадыр. Вераны Архангельскида түгел, ә Пинеж районында тирләгәннәр, диелә бу хәбәрдә.

Хәзер Кира белән Кристина сак астында, алар хөкем карары чыгарганны көтә.

«Кызлар мәрхүмәне гел җәберләде. Мәрхүмә бик ышанучан иде, алар дус булмады. Бу кыз үзе дә салгалый иде», — дип сөйләгән кызларның сыйныфташы 29.RU порталына.

Бу кыз сүзләренчә, җинаятьче кызлар икесе дә мәрхүмә белән моргта хушлашу чарасына килә. «Алар тыныч иде, еладылар да әле. Аннары көлешеп, тукталышка китеп бардылар», — дип искә ала ул.