Суга бата башлаган этне коткарырга маташкан ир-ат үлгән, аның йөкле хатыны тол калган | intertat.tatar

Суга бата башлаган этне коткарырга маташкан ир-ат үлгән, аның йөкле хатыны тол калган

Әлеге фаҗига мәрхүмнең әтисе күз алдында булган.

Мәскәү өлкәсендә суга бата башлаган этне коткарырга тырышкан ир-ат һәлак булган. Аның тол калган яшь хатыны бәби көтә. Бу турыда «МК» сайты хәбәр итте.

30 яшьлек Сергей 31 яшьлек хатыны Анастасия белән Отрадное районында яши, аның әтисе Лосиноостровский районында тора.

Фаҗига булган көнне Сергей ике яшьлек спаниель этен ала һәм әтисе белән очрашуга килә. Алар кичке алтылар тирәсендә эт белән урамда йөрергә чыгалар. Эт юка боз өстенә кереп китә һәм бата башлый. Эт үзе судан чыгарга маташа, тик булдыра алмый. Шуннан соң аның коткарырга дип хуҗасы да бозлы суга керә.

Сергейның аягын көзән җыерган булуы ихтимал, шуңа күрә ул үзе дә бата башлый. Шаһитлар экстрен хезмәтләргә хәбәр итә. Коткаручылар килеп җиткәндә Сергей да, аның эте дә су астына киткән була инде. Аларның мәетләрен берничә сәгатьтән соң гына табалар.

Мәрхүм ир-ат эколог булып эшли. 2016 елда ул Анастасия исемле кызга өйләнә. Алар бик озак вакыт бәби табу турында хыяллана. Ниһаять, 31 яшьлек Анастасия бәбигә уза. Ул җиденче ай йөкле була, хатын ир бала көтә.

Фаҗига булган көнне көндез Сергей аны бала тудыру йортына ятарга илтеп куя. Кич белән Сергей хатыны янына хастаханәгә әйберләр китерергә планлаштыра.

Сергейның үлеме турында Анастасиягә кайнатасы әйткән, диелә хәбәрдә.