Казан янындагы авылда торган күчмә мунчаны урлаганнар

Хуҗа кеше полициягә гариза язган, милеген күрүчеләр булса, хәбәр итүне сорый.

Татарстанда яшәүче ир-ат Казан янындагы бер авылда супермаркет янына күчмә мунча урнаштырган булган. Шушы мунчаны урлап алып киткәннәр. Бу турыда социаль челтәрдәге @salmachi_online аккаунтына сылтама белән «Татар-информ» хәбәр итте.

Югалган милек хуҗасы социаль челтәрдә сөйләгәнчә, күчмә сауна-мунча Көек авылында супермаркет тирәсендә торган. Хәзер бу ир-ат мунчасын күргән кешеләр булса, үзенә хәбәр итүләрен сорый.

«Татар-информ» агентлыгына Татарстан буенча Эчке эшләр министрлыгы матбугат хезмәтендә хәбәр иткәнчә, мунча хуҗасы полициягә гариза язган. Күчмә сауна торган урынга полиция хезмәткәрләре дә барып кайткан.

Хәзерге вакытта җинаять эше, яки административ эш кузгату турында мәсьәлә хәл ителә, дип аңлаталар ведомствода.