Татар егете сигез солдатны үтергән частьта устав үтәлешен тикшерәләр

«Хәрби хезмәткәрләр арасында устав кагыйдәләрен бозу» маддәсе буенча эштә Рамил Шәмсетдинов һәм тагын берничә солдат зыян күрүче дип табылган.

Байкал аръягында хәрби частьта хезмәт итүче Рамил Шәмсетдинов сигез хезмәттәшен атып үтергәннән соң, частьта уставка туры килмәгән мөнәсәбәтләр турында җинаять эше ачылган. Бу турыда Рамилнең адвокаты Руслан Нагиевка сылтама белән «Интерфакс» агентлыгы хәбәр итте.

«Рамил Шәмсетдинов хезмәт иткән частьта уставка туры килми торган мөнәсәбәтләр булу турындагы безнең версия хәзерге вакытта раслана. Моны җинаять эше ачылу раслый. Эш «Хәрби хезмәткәрләр арасында устав кагыйдәләрен бозу» маддәсе буенча ачылды. Әлеге эш буенча Рамил Шәмсетдинов һәм тагын берничә солдат зыян күрүче дип табылды», — дип әйткән Нагиев.

Адвокат сүзләренчә, ул Рамил белән очрашкан. Рамил хезмәттәшләре белән мөнәсәбәтләр турында сөйләгән. «Чыннан да, алар арасында уставка туры килми торган мөнәсәбәтләр булган. Шәмсетдиновны мораль яктан да, физик яктан да кимсеткәннәр», — дип әйткән адвокат.

25 октябрьдә кич белән Байкал аръягы өлкәсендә хәрби частьта Рамил Шәмсетдинов исемле солдат-срочник хезмәттәшләрен атып үтергән. Ул Төмән өлкәсенең Вагай авылында Эчке эшләр министрлыгы хезмәткәрләре гаиләсендә туган. Бу турыда Вагай районы администрациясендә эшләр белән идарәче Елена Шаргина сүзләренә сылтама белән ТАСС агентлыгы хәбәр итте.