Чаллы кешесен нәни кызын көчләүдә гаеплиләр

Әти кеше исерегәч, гаиләсен өйдән куып чыгара торган булган.

Чаллыда бер әтине үз кызын көчләүдә гаеплиләр. «Челнинские известия» сайты Тикшерү бүлегендә ачыклаганча, 40 яшьлек ир-атка карата җинаять эше ачылган.

Моңа кадәр дә хөкем ителгән бу кешене «Сексуаль характердагы көчләү гамәлләре» маддәсе буенча гаеплиләр.

Башлангыч сыйныфта укучы кыз бала сүзләренчә, 15 гыйнварда төнлә белән аңа әтисе ташланган. Кыз балага судмедэкспертиза билгеләнгән.

Ир-атның исерткеч эчемлекләр эчүе билгеле. Ул гаиләсен берничә тапкыр өйдән дә куып чыгарган.

Моңа кадәр Чаллыда тагын бер ир-атка карата җинаять эше ачылган. 47 яшьлек кеше 12 гыйнварда кичке дүртләр тирәсендә яшүсмер кызга карата «азгын гамәлләр» кылган. Ул өенә кайтып бара торган балага йортта баскычлар арасында мәйданда бәйләнгән.

Кыз барысын да әти-әнисенә сөйләгән, алар полициягә гариза язган. Азгын ир-атны тоткарлаганнар. Аның психик авыруы булуы ачыкланган.

Бу атнада Чаллы суды Станислав П.ны хөкем иткән. Аны балигъ булмаган балаларга карта көчләү гамәлләре өчен 14 елга ирегеннән мәхрүм иткәннәр.