Тәрәзәдән егылып төшкән 89 яшьлек әбине астагы ир-ат тотып алган

Полициядә эшләүче бу ир-ат әлеге вакыйгадан соң үзе хастаханәгә эләккән.

Санкт-Петербургның Калинин районында бер йортта карт әби тәрәзәдән егылып төшә. Аны аста полиция хезмәткәре тотып кала. Бу турыда «Комсомольская правда» хәбәр итте.

Просвещение проспектындагы бер йортта яшәүчеләр борчылып полициягә шалтырата. Алар икенче кат тәрәзәсендә торган әбине күреп ала. 89 яшьлек карчык менә-менә тәрәзәдән егылып төшәргә тора. Урынга берничә минут эчендә полиция хезмәткәрләре килеп җитә. Нәкъ менә шул чакта әби егылып төшә.

 «Урынга килеп җиткән полиция хезмәткәрләре 89 яшьлек әбине аста тотып алырга өлгерә. Карчыкны ашыгыч ярдәм табибларына тапшыралар. Аның хәле уртача авырлыкта дип бәяләнә. Әби хәзер хастаханәдә ята. Бәхеткә, полиция хезмәткәре ярдәм итеп өлгерә, юкса карчык җитди имгәнгән булыр иде», — дип сөйли Эчке эшләр министрлыгының Санкт-Петербург һәм Ленинград өлкәсе буенча баш идарәсе вәкиле.

Әбине коткарган 43 яшьлек Евгений Беляков прапорщик булып эшли. Әбине тотып калганда аның кулы имгәнә. Карчык полиция хезмәткәре кулына килеп төшкәндә аркасын бәргән. 

Эчке эшләр министрлыгының Санкт-Петербург һәм Ленинград өлкәсе буенча баш идарәсенең җитәкчелеге полиция хезмәткәрен бүләкләү турында карар кабул иткән, диелә бу хәбәрдә.