Голливуд актеры Джон Траволтаның хатыны яман шештән үлгән

Актриса Келли Престон«Джерри Магуайер» фильмында уйнаган иде.

Дөньяда билгеле актер, Голливуд артисты Джон Траволтаның хатыны 57 яшендә үлгән. Аның күкрәгендә яман шеш булган. Бу турыда НТВ каналы хәбәр итте.

Джон Траволта хатыны — актриса Келли Престон вафаты турында инстаграмда язып куйган.

«Йөрәгемә бик авыр, минем гүзәл хатыным Келли күкрәк бизе яман шеше белән ике еллык көрәштә оттырды», — дип яза ул.

Джон Траволта онкология үзәгендәге табибларга, шәфкать туташларына Келлиның тормышы өчен көрәшкән, Келли янында булган өчен рәхмәт әйтә. Актер үзен ятим калган балаларына багышларга теләвен яза.

Джон Траволта һәм Келли Престон 1991 елда өйләнешә. Аларның ике улы һәм бер кызы бар иде. 2009 елда аларның 16 яшьлек улы һәлак була. Үсмер ванна кырыена бәрелгәннән соң үлгән, диелә бу хәбәрдә.

Келли Престон «Близнецы», «От заката до рассвета», «Поле битвы: Земля», «Джерри Магуайер» кебек кинолардагы рольләре белән таныш.