Минзәләдән килгән егет Чаллыда таксист кызга пычак белән ташланган

Минзәләдән килгән егет Чаллыда таксист кызга пычак белән ташланган
Чаллы шәһәрендә таксист кызга пычак белән һөҗүм иткәннәр. Бу турыда "Челнинские известия" сайты хәбәр итте.

10 октябрьдә кичке уннар тирәсендә 21 яшьлек егет такси машинасына утыра. Ул пычак тартып чыгара һәм таксист кызга "Үтерәм" дип яный башлый. Шуннан соң йөртүче тиз генә чыгып, машинаны бикли. Һөҗүм итүче егет исә машина эчендә ябылып кала.

Һөҗүм итүче егет исерек була. Таксист кыз куркып калмый, полиция килгәнче егетне машинасы эчендә бикләп тота. Аңа шаһитлар да ярдәм итә.

"Челнинские известия" хәбәрчесе Эчке эшләр министрлыгының Чаллы буенча идарәсе белән элемтәгә чыга. Биредә һөҗүм итүче егетнең шәхесе турында әйтәләр. Ул Минзәлә районының Югары Тәкермән авылында яши. Аны тоткарлаганнар. Бу кешегә карата "Үтерү белән янау" маддәсе буенча җәза бирүләре ихтимал, диелә хәбәрдә.

Бу вакыйганы күреп торган шаһитлар видеога төшереп алган. Видео кадрларын "Татар-информ" сайты күрсәтте.