Ленинград өлкәсендә район башлыгы Илдар Гыйләҗев коронавирустан соң вафат | intertat.tatar

Ленинград өлкәсендә район башлыгы Илдар Гыйләҗев коронавирустан соң вафат

Ул Выборг районы администрациясе башлыгы вазифасына былтыр ноябрьдә билгеләнгән иде.

12 июньдә Ленинград өлкәсенең Выборг районы башлыгы Илдар Гыйләҗев вакытсыз вафат булды. Бу турыда «78 канал» хәбәр итте.

Илдар Гыйләҗев әлеге постка күптән түгел генә билгеләнә. Аңа 57 яшь иде. 

ТАСС белешмәсе буенча, Илдар Гыйләҗев коронавирус белән каты авырган һәм аны Ленинград өлкә клиник хастаханәсенә салган булганнар. Ул бүген 08.45 сәгатьтә үлгән.

Ленинград өлкәсе хакимияте кайгы уртаклашты. «Аны Выборг кешеләр дә, Ленинград халкы да хөрмәт итте һәм яратты. Безнең командада шундый кеше булуы белән горурланам. Бөтен Ленинград өлкәсе халкы белән бергә Илдар Гыйләҗевнең туганнары һәм якыннарының кайгысын уртаклашам», — дигән өлкә губернаторы Александр Дрозденко.

Илдар Фәхыйм улы Гыйләҗев 1964 елның 14 июнендә Оренбург өлкәсенең Акбүләк бистәсендә туа. 1990 елда Оренбург авыл хуҗалыгы институтын тәмамлый. Былтыр ноябрьдә Ленинград өлкәсенең Выборг районы башлыгы итеп билгеләнә. Аның биографиясе белән Ленинград өлкәсенең рәсми сайтында танышып була.