Талаша башлаган кызны егете машина астына төртеп кертеп үтергән

10 октябрьдә Мәскәүнең Киев вокзалы янында бер кызны электробус астына этеп җибәрәләр, ул һәлак була, дип яза rusvesna.su сайты.

Егете белән сүзгә килү аркасында яшь кызның гомере шулай тиз һәм аянычлы өзелә. Видеокүзәтү камераларында күренгәнчә, әлеге ызгышны кыз башлый. Ул ир-егеткә суга, тегесе кыз яныннан читкәрәк китә, соңыннан аңа «җавап» бирергә тели булса кирәк, кызны машиналар йөри торган юлга таба этеп җибәрә. Нәкъ шул мизгелдә тукталышка электробус килеп туктый. Кыз аның арткы тәгәрмәчләре астына эләгә.

Кызны коткарып кала алмаганнар, ул вафат булган. Ир-атка карата җинаять эше ачканнар.

Расланмаган мәгълүматларга караганда, ир-егет тә, хатын-кыз да Азәрбәйҗан кешеләре.