Әлмәт район хастаханәсенең табиб-инфекционисты вафат
59 яшьлек Игорь Федоров үлеменең сәбәпләрен ачыклау өчен экспертиза билгеләнгән.
Әлмәт үзәк район хастаханәсендә табиб-инфекционист булып эшләүче Игорь Федоров вафат. Аңа 59 яшь иде. Бу турыда «Татар-информ» агентлыгына Татарстан Сәламәтлек саклау министрлыгында хәбәр иткәннәр.
Игорь Васильевич Федоров Төркмәнстан ССРның Ашхабад шәһәрендә 1961 елда туган. 1985 елда Төркмәнстан дәүләт медицина университетын «педиатрия» белгечлеге буенча тәмамлаган, аннары йогышлы авырулар буенча интернатура бетергән.
1986-2010 елларда Ашхабад шәһәрендә йогышлы авырулар хастаханәсендә анестезиолог-реаниматолог булып эшли. Аннары җиде ел дәвамында Төркмәнстан Сәламәтлек саклау һәм медицина сәнәгате министрлыгында Профилактика һәм дәвалау үзәгендә хезмәт итә.
2018 елда Игорь Федоров Әлмәт шәһәренә күченә. Ул Әлмәт район үзәк хастаханәсенең инфекцион бүлегендә табиб-инфекционист булып эшли.
«Үзен аямыйча хезмәт итә торган табиб иде, ул бар булганын пациентларга бирде», — дип искә ала мәрхүмнең хезмәттәшләре.
Татарстан Сәламәтлек саклау министрлыгы мәрхүмнең якыннарының кайгысын уртаклаша.
Табибның үлеменең сәбәпләре экспертизадан соң билгеле булачак, диелә хәбәрдә.