Авариядә үлгән 22 яшьлек ирнең йөкле хатыны тол, бер яшьлек улы ятим калган

Туймазыда яшәүче 22 яшьлек ир-ат идарә иткән Kia Riо машинасы каршыга килә торган Scania йөк машинасына бәрелә. Йөк машинасы белән биредә үк яшәүче 52 яшьлек ир-ат идарә итә. Кызганычка, 22 яшьлек Арсен һәлак була. «КП-Уфа» сайты шул хакта язды.

Машиналар шулкадәр каты бәрелешә, җиңел машина берничә кисәккә бүленә, запчастьләр юлга чәчелә.

«Яныннан узып киттек, коточкыч иде», — дип сөйли шаһитлар.

Якынча версия буенча, җиңел машина белән идарә итүче кеше каршы якка чыккан һәм йөк машинасына бәрелгән. Биредә яшәүчеләр бу юлда тирән «колея» булуын да әйтә.

«Яңгыр бик нык ява иде, әле өстәвенә колея да тирән. Аквапланирование булып, машинаны каршы якка чыгарып аткандыр», — дип фаразлый Илнур исемле шаһит.

Авариягә очраган иномарка эчендә 22 яшьлек ир белән хатын — Арсен һәм Аурика була. Арсен урында ук үлә, Ауриканы хастаханәгә алып китәләр. Хәзер аны реанимациядән палатага чыгарганнар инде.

Аурика хәзерге вакытта бәби көтә. Арсен белән Ауриканың бер яшьлек уллары да үсеп килә, диелә хәбәрдә.

Башкортстан буенча Гадәттән тыш хәлләр комитетының матбугат хезмәте әлеге фаҗига урыныннан фотоларны күрсәтте.