Йөкле икәнен сизмәгән хатын сәяхәттә бала тудырган

Автобуста хәле киткән кызга ярдәм итәргә килгән табиблар бала туасын хәбәр иткән.

Бөек Британиядә яшәүче кыз берничә ай элек сөйгән егете белән Австралия буйлап сәяхәткә чыгып киткән. Кыз сәяхәт вакытында бала тудырган. Шуңа кадәр ул йөкле булуын сизмәгән дә. Бу турыда ABC Sunshine Coast сайтына сылтама белән РЕН ТВ хәбәр итте.

Егет белән кыз сәяхәтне Фрейзер утравында тәмамларга җыена. Автобуста барганда кызның кәефе китә. Урынга табиблар чакыралар. Табиблар исә кызны шаккаттыра. «Хәзер бала тудырасың», — дип әйтәләр.

Кыз шок халәтенә килә, ул йөклелеген бөтенләй дә белмәгән, билгеләрен дә сизмәгән.

Яңа туган бала 1,7 кило авырлыкта. Аңа Гарри дип исем кушканнар. Ул бик кечкенә булганга, аның барлыгын әнисе соңгы минутка кадәр белмәгән.

Яшь әти белән әни әлегә Брисбендагы бер гаиләдә яшәп тора. Бала бераз тернәкләнгәч, алар Бөек Британиягә кайтырга җыена, диелә бу хәбәрдә.