Башкортстанда 39 кеше утырган туристлар автобусы ике фурага бәрелгән
Йөк машиналарын йөртүчеләр икесе дә урында һәлак булган.
7 мартка каршы төн уртасында Башкортстанның Иглин районында М5 трассасында ике йөк машинасы һәм автобус бәрелешә. Автобуста 39 кеше, шул исәптән 11 бала була. Автобус Таганай-Уфа маршруты буенча бара. Йөк машиналары йөртүчеләр икесе дә урында һәлак була, автобус йөртүчесе һәм пассажир бала медицина сорап мөрәҗәгать итә. Бу турыда «Башинформ» хәбәр итте.
Самара-УФа-Чиләбе юлының 1496 нчы километрында хәрәкәт тулысынча туктап кала. Фура юлга аркылы яту сәбәпле, биредән бөтенләй узып булмый. Юл инспекторлары әйләнеп узу юлын оештыра.
Йөк машиналары икесе дә «Камаз» булган. Аларның берсе белән Саратов өлкәсендә яшәүче 33 яшьлек ир-ат, икенчесе белән Ставрополь өлкәсендә яшәүче 56 яшьлек ир-ат идарә итә.
Йөк машиналары башта икесе бәрелешә, аннары аларга Yutong автобусы килеп бәрелә. Аның белән Уфада яшәүче 47 яшьлек ир-ат идарә итә.
Автобус Уфага кайта, ул кешеләрне Чиләбенең Златоуст шәһәреннән туристик сәяхәткә алып барган. Авариядән соң резерв автобус килеп, туристларны алып кайтып китә, диелә хәбәрдә.
