Дүрт бала һәм аларның атасы янып үлгән

Коточкыч фаҗигадә әни кеше исән калган, ул пешеп бетсә дә, ут арасыннан чыга алган.

Иркутск өлкәсендә янгын вакытында дүрт бала һәм аларның атасы һәлак булган. Бу турыда Россия Гадәттән тыш хәлләр министрлыгының Иркутск өлкәсе буенча баш идарәсенең матбугат хезмәте хәбәр итте.

Фаҗига шимбәгә каршы төндә була. Баргадай авылындагы шәхси йортта ут чыга. Янгын вакытында торак йорт бөтенләй янып беткән, ишегаллары да күмергә әверелгән. 422 квадрат метр мәйданда хәрабәләр генә калган.

Янгын турында төнге икенче ярты тирәсендә хәбәр итәләр. Коткаручылар килгәндә бөтен йорт һәм каралты-кура ут эчендә, күрше йортларга да ут күчү куркыныч була. Янгынны иртәнге алты тирәсендә генә сүндереп бетерәләр.

Ведомство хәбәр иткәнчә, йортта 41 яшьлек хатын, 40 яшьлек ир-ат була. Гаилә башлыгы, 6, 5, 4 яшьлек өч малай һәм 2 яшьлек кыз бала янып үлә. Әни кеше пешеп беткән, ул авыр хәлдә хастаханәдә. «Янгын турында соң хәбәр ителде. Коткаручылар килгәндә ут бөтен җирне чолгап алган иде. Шулай да хатын уттан чыгып котыла алган», диелә хәбәрдә. 

«Гаилә социаль яклау органнарында хисапта тора. Быел мартта йортны янгын куркынычсызлыгы ягыннан тикшерделәр. Әти-әни белән күп тапкыр аңлату эшләре алып барылды», — дип сөйли Иркутск өлкәсе буенча янгын күзәтчелеге дәүләт баш инспекторы урынбасары  Александр Кузнецов.

Янгын сәбәпләре ачыклана.