Тверь өлкәсендә давыл вакытында өч кеше үлүе билгеле булды
Җимерелгән йортлар, ауган агачлар сурәтләнгән кадрлар социаль челтәрләрдә чыкты.
2 августта Тверь өлкәсендә көчле давыл котырды. Өермә юлына очраган корылмаларны җимерде, түбәләрне куптарды, үткәргечләрне өзде, агачларны аударды. Гарасат вакытында өч кеше үлү турында «Комсомольская правда» хәбәр итте.
Андреаполь районы үзәгенә аеруча зур зыян килә. Биредә җил тизлеге секундына 25 метрга җитә. Аннары Ржев һәм Перно шәһәрләре дә давыл эчендә кала.
Өермә, җимерелгән йортлар, ауган агачлар сурәтләнгән кадрлар социаль челтәрләрдә чыкты.
Урында коткаручылар эшли. Тверь губернаторы Игорь Руденя гарасат нәтиҗәләрен бетерү комиссиясен җитәкли. Зыян күрүчеләргә ярдәм итәчәкләр, диелә хәбәрдә.
