Саба районында ир белән хатынны урманда вәхшиләрчә үтергәннәр

65 һәм 62 яшьлек ир белән хатын урманга ял итәргә барган булган.

Татарстанның Саба районындагы Шәмәрдән авылы янындагы урманда 65 һәм 62 яшьлек ир белән хатын урманга йөреп кайтырга киткән һәм югалган. Алар өйгә кайтмагач, туганнары һәм танышлары эзли башлаган.

29 ноябрьдә кичке якта ир белән хатынның мәете табыла. Аларны пычак белән кадап үтергәннәр. Бу турыда Россия Тикшерү комитетының Татарстан буенча Тикшерү идарәсе матбугат хезмәте хәбәр итте.

«29 ноябрьдә төнлә белән Шәмәрдән авылы янындагы урманда ир белән хатын мәете табылды. Аларның гәүдәсе пычак белән кискәләп бетерелгән. „Ике яки аннан да күбрәк кешене үтерү“ маддәсе буенча җинаять эше ачылды», диелә ведомство хәбәрендә.

Башлангыч версия буенча, пенсионер ир белән хатын көндез урманга китә, ләкин алар әйләнеп кайтмый. Туганнары һәм танышлары аларны эзли башлый һәм караңгы төшкәч, мәетләрне табалар.

Хәзерге вакытта тикшерү эшләре бара, диелә хәбәрдә.