Очучы Дамир Әхмәтовның гаиләсенә 30 млн сум компенсация бирү турында суд карары чыкты

Икенче пилот Дамир Әхмәтов Мәскәү-Анапа рейсы вакытында үлгән.

«Аэрофлот» компаниясе хезмәткәре — очучы Дамир Әхмәтов 2019 елның ноябрендә рейс вакытында вафат булган. Омск суды карары буенча, «Аэрофлот — Российские авиалинии» оешмасы пилотның тол хатыны Анастасия Әхмәтовага 29,7 млн сум компенсация түләргә тиеш була. Бу турыда ТАСС агентлыгы Омск шәһәренең Киров районы судының матбугат хезмәтенә сылтама белән хәбәр итте.

2019 елның 24 ноябредә икенче пилот булып рейска чыккан Дамир Әхмәтовның хәле китә. Гадәттән тыш хәл Мәскәү-Анапа маршруты вакытында була. Самолет Ростов-на-Дону шәһәрендә туктый. Ашыгыч ярдәм табиблары пилотның үлемен раслый.

Судмедэкспертиза пилот үлемен производствода бәхетсезлек очрагы дип танымый. Шуңа күрә авиакомпания мәрхүм пилот гаиләсенә килешү буенча түләнергә тиешле сумманы бирүдән баш тарткан. Килешү буенча әлеге сумма ун тапкыр еллык хезмәт хакы күләмендә каралган.

«2020 елның 3 августында үзе һәм балигъ булмаган балалары исеменнән эш итүче А.Г Әхмәтова шикаятен тикшергәннән соң, „Аэрофлот — Российские авиалинии“ Әхмәтова хисабына 29 млн 722 мең 608 сум түләргә тиеш дигән карар чыгарылды», диелә хәбәрдә.

«Аэрофлот» бу карарны шикаять итәчәк. Бу турыда авиакомпаниянең рәсми вәкиле Михаил Демин әйткән.

«Пилотның авырулары һөнәри авырулар нормативы буенча күрсәтелгән исемлеккә керми. Ул авыруы турында белгән, әмма яшергән дип уйларга нигез бар. Шулай итеп ул рейс пассажирларының гомерен һәм сәламәтлеген дә куркыныч астына куя. Безнең юристлар әлеге карарны шикаять итәчәк», — дигән ул.