Әтисен эзләп чыгып киткән ун яшьлек бала югалган

Данилның үзе белән акчасы да, мобиль телефоны да юк.

Оренбург өлкәсенең Сакмар районындагы Чапаев авылында яшәүче 10 яшьлек Данил Казаков югалган. Бу турыда Россия Тикшерү комитетының Оренбург өлкәсе буенча идарәсе матбугат хезмәте хәбәр итә. Баланың фотосы Тикшерү комитеты сайтында урнаштырылган.

Данил 19 ноябрьдә кичке тугыз тулганда өеннән чыгып китә. Хәзерге вакытка кадәр баланың кайда булуы билгесез. Өлкә буенча тикшерү органнары җинаять эше ачкан.

Баланы Эчке эшләр министрлыгы һәм Гадәттән тыш хәлләр министрлыгы хезмәткәрләре, тикшерүчеләр, битараф булмаган кешеләр эзли.

«Тикшерү төрле версияне барлый. Шул исәптән Данил Казаков мөстәкыйль рәвештә узып баручы транспортта утырып хәрәкәт итә дип тә фаразлана. Бу малай әтисен эзләп Ульяновск өлкәсенә чыгып киткән булуы ихтимал. Бала Башкортстан, Татарстан, Чувашия, Мордовия, Самара өлкәләре аша әтисе янына барырга мөмкин», — дип сөйләгән тикшерүчеләр.

Данил Казаковка карап торышка ун яшь. Буе 140 см чамасы. Ябык гәүдәле, күзләре соры, чәчләре саргылт. Кызыл төсле, капюшонлы, кыска куртка, ачык зәңгәр төсле джинс чалбар, кара төсле бәйләнгән башлык, кара төсле ботинка (астында ак сызыгы бар), зәңгәр төсле майка кигән. Үзе белән акчасы да, мобиль телефоны да юк.

Бу бала турында мәгълүматы булган һәркемгә Оренбург буенча Тикшерү комитетына 8 (3532) 34-38-01 телефонына шалтыратырга сорыйлар. Шулай ук 123 (балага куркыныч яный) яки 02 номерына да шалтыратырга мөмкин.