Ришат Төхвәтуллин концертыннан мизгелләр: Алиянең яңа роле, табибның җырчыга әйләнүе...

«Уникс» бинасына якынайганда, кеше байтак җыела башлаган иде инде. Дус кызымны көтеп, ишек янында басып торганда, бер абый яныма килеп, биредә узасы чара, билет бәяләре турында сорашты. «Пушкин картасы» белән билет алдым, дигәч, көлемсерәп китеп барды. Дус кызым килгәч, җәлт-җәлт кенә бинага кереп, өс киемнәребезне тапшырдык. Концерт залына юнәлдек, тик юлыбызны фотограф «кисте». «Әйдәгез, кызлар, сезне фотога төшерим әле», – ди бу. Без бик теләп ризалаштык, бу фотоларны каян карап булачак икәнен сорап та тормадык, мөгаен, интернетка – Ришатның төркемнәренә куярлар, дип уйладык.

Концерт соңарып башланды. Без 15 минут буе сәхнәдәге экраннан Линар Шәймөхәммәтовның булачак концерты, Ришат Төхвәтуллинның кием бренды турында «реклама» карап утырдык. Тамашачылар кул чабып та карадылар, тик файда булмады.

Казан тамашачысының Ришат Төхвәтуллинның концертларына «сусаганы» күренә иде

Ниһаять, концерт башланды! Ришатның сәхнәгә чыгуы бик «эффектно» булды. Беренче чыгышын тәмамлап, Ришат Төхвәтуллин залны сәламләде: «Хөрмәтле тамашачылар, без хәзер чыннан да ашкынулы үзгәрешләр чорында яшибез. Дөнья белән бер сулышта, бер адымда булырга тырышып, без дә үзгәрергә тырышабыз. Күргәнегезчә, төркемебездә – яңа йөзләр, экранда – ясалма фәһем ярдәмендә ясалган видеотасма, ныклап әзерләнгән Band, бэк- вокал төркеме һәм Виталикның өр-яңа баяны. Чираттагы яңа «Тормыш дулкыннары» җырым – сезнең өчен».

Казан тамашачысының Ришат Төхвәтуллинның концертларына «сусаганы» күренә иде. Аның һәр чыгышын зал бик җылы кабул итте, алкышларга күмде.

«Иң мөһиме, ул «бухгалтерия башлыгы булмасын»

Ришат күптән түгел гаиләле булды, хәзер аны Алиясез күз алдына да китереп булмый. Шуңа Алиянең дә бу концертта чыгыш ясавы көн кебек ачык иде. Ришат: «Төркемгә хәзер кызларны үзем сайламыйм. Тормышымда хәзер яңа «кадрлар бүлеге башлыгы» – Алия Төхвәтуллина бар. Иң мөһиме, ул «бухгалтерия башлыгы булмасын», – дип шаяртып, сәхнәгә тормыш иптәшен чакырды. Алия репертуарындагы яңа «Ромашкалар» һәм «Кышкы чия» җырларын башкарды. Чыгышын дәвам итеп: «Ришатны кызларга көнләмисеңме, диләр. Ә мин, киресенчә, Ришаттан көнләшәм, чөнки ул яраткан тамашачысы белән еш күрешә», – диде ул. Чыннан да, декрет ялында булу сәбәпле, Алияне сәхнәдә күрү бик сирәк күренешкә әйләнде шул.

Концертта быелгы язның хиты булган «Гомерем буе» җырын да ишетергә насыйп булды. Күпме җылылык һәм мәхәббәт салынган бу җырга! Гомумән, үзем Ришатның барлык җырларын да яратам, тик монысын – аеруча. Күпме тыңласам да тыңлап туя алмыйм мин аны. Ришатның тыңлаучылары барысы «в восторге» иде бу җырдан, чөнки интернетта да бу хит белән видеолар тулган.

Ришатның төркеме зур икәненә дә игътибар иттем, аларны «кулда тоту» авырдыр. Ут куелышы, тере тавыш, дәртле биючеләр – барысы югары дәрәҗәдә булды. Концертта үзем өчен көчле тавышка ия булган яңа җырчы «ачтым», бу – бэк-вокалда торучы Гүзәл Асылбаева. Ришат аны үзенең күптәнге дусты дип игълан итте, «минемчә, аның урыны сәхнәдә» диде.

Линар Шәймөхәммәтовның Ришат белән тавышлары охшаш икәнен сизгәнем булды. Ул, сәхнәгә чыгып, «Мәхәббәт ялкыны» һәм авыл турындагы яңа җырын башкаргач, моңа тагын бер кат инандым. Искиткеч, тыңлап туя алмаслык тавышы Линарның! Аның, һичшиксез, зур сәхнәләрне яулыйсын мин йөз процент әйтә алам, башкача була да алмый! Кызганыч, Линарның яңа җыры Интернет киңлекләренә чыкмаган әле. Үзем авыл кызы булгач, авыл турындагы җырлар күңелгә аеруча якын бит, бу җыр да искәрмә булмады. Линар, тизрәк чыгар әле бу җырны!

«Зенит-Казан» волейбол командасының табибы белән квартет

Социаль челтәрләрдән Ришатны карап баручылар аның йөгерергә, волейбол уйнарга яратканын беләдер. Аның концертына хәтта «Зенит-Казан» волейбол командасының баш тренеры Алексей Вербов һәм команданың табибы Илшат Сәгыйтов та килгән иде. Әле Илшат Сәгыйтов сәхнәгә чыгып Ришат Төхвәтуллин, Алия Төхвәтуллина, Линар Шәймөхәммәтов белән Казан турында җыр да башкарды. Гаҗәеп матур чыгыш килеп чыкты!

Ришат иң романтик җырларының берсе булган «Мәхәббәтем»не башкарганда, тамашачылар телефондагы утларын кабызды һәм «Уникс» залы йолдызлы күккә әйләнде. Шундый мәхәббәтле, сихри мохит барлыкка килде.

Гадәттә, Ришатның концертларында яшьләр урыннарында утыра алмый, сәхнә янына биергә агыла. Тик монда концертның 2 сәгате үткәч кенә яшьләр «уянып» китте. Ник үзен чыгып биемәдең, димәгез, минем урынымнан сәхнә янына чыгу өчен катлаулы «маршрут» үтәргә кирәк иде. Шуңа мин тормышымны артык катлауландырмыйча, утырган җиремнән генә торып биергә булдым. Халык тәменә кереп бии генә башлагач, Ришат үзенең төркеме белән таныштыра башлады. Кайберәүләр моны концертның бетүе дип аңлап, «гардероб»ка чаптылар, алар, чиратта басып торасы булмас, дип ашыкканнардыр инде, мөгаен.Ә монда бит концерт бетмәде! Борынгылар юкка гына «ашыккан ашка пешкән» дип әйтмәгәннәр инде, кичәнең иң матур, дәртле өлешеннән колак кактылар бит! Эх, сез...

Кайбер җырларны Ришат икешәр тапкыр башкарды, халык та ана кушылып биеде, җырлады. Ришатның – тамашачылардан, тамашачыларның Ришаттан аерыласы килмәгәне күренә иде! Халыкның мәхәббәтен яулый алган бит Ришат! «Афәрин!» диясе генә кала. Концертта алган эмоцияләрдән үземнең дә «каз тәннәре» чыкты, бик ошады. Рәхәтләнеп ял итеп кайттым.

500 сумга бер фото алырлык дәрәҗәдә баемадык шул әле..

Концерт бетеп, «гардероб»ка юнәлгәндә, күзем фойеда өстәлгә җәеп салынган фотоларга төште. Концерт башланганчы дус кызым белән мине фотога төшергән абый безне танып алды да фотобызны безгә сузды. «500 сум» ди бу, минәйтәм, «абый, бер фото 500 суммы?», ул «500 генә бит» дип елмайды. Рәхмәт, 500 сумга бер фото алырлык дәрәҗәдә баемадык шул әле...