Илсөя Бәдретдинова яңа җыры чыгу уңаеннан тамашачыларына акча өләшә
Татарстанның атказанган җырчысы Илсөя Бәдретдинова яңа җыры чыгу уңаеннан конкурс игълан иткән, ә җиңүчеләргә акча вәгъдә итә.
«Менә рәхим итеп тагын бер матур җыр чыкты – «Иртәрәк»! Тыңлап кара әле рәхим итеп! Ошаса «матур» дип яз. Ошамаса, «нык матур» дип яз. Җыр чыгу хөрмәтенә конкурс игълан итәм! Матур-матур видеолар төшерергә кирәк!
Шарты мондый: «Гомерләр көзенә керергә» дигән юлны үзең җырлыйсың, ә «иртәрәк» дигән сүзен башка кешеләрдән әйттерәсең. Күбрәк кеше әйткән саен «текәрәк» булачак! Сториска мине билгеләп куегыз. Үзем санап утырам лично!
Беренче урынга: 10 000 сум
Икенче урынга: 5000 сум
Өченче урынга : 3000 сум», – дип җырчы тамашачыларын кызыксындырган.
Җырның авторлары – Рауза Хафизова белән Айдар Тимербаев.
«Тузгытты көз җирән чәчләрен,
Сүрелгәч җәйләрнең кызуы.
Моңаймыйм, зарланмыйм әле мин:
«Уф, бу, – дип, – гомернең узуы».
Кушымта :
Әле күп туасы иртәләр,
Исәсе җилләре иркәләп.
Гомерләр көзенә керергә
Иртәрәк, иртәрәк, иртәрәк...»
