Илсөя Бәдретдинова төркемендәге җырчы, музыкант Илнур Колахмәтов өченче тапкыр әти булачак.
Колахмәтовлар гаиләсе, артык зурдан купмыйча гына, шул ук вакытта бик күңелле итеп, гендер-пати уздырган. Илнур тормыш иптәше һәм уллары белән парк буйлап саф һава сулап йөри. Бер мәлдә барысы да тукталалар, ә Илнур кулындагы уенчык тупны тибеп җибәрә. Туп эченнән күккә зәңгәр төстәге төтен сибелә.
Димәк, 2 малай үстерүче Колахмәтовлар гаиләсе тагын 1 ир балага артачак. Ул үзе дә: «Тиздән бишәү булачакбыз. Футбол командасы! Яратам!» – дип язып, видеоны социаль челтәрләргә куйган.
«Чынлап диге-ен? А-а-а! Котлыйм!» – дип, иң беренче комментарийны Илнурга Илсөя Бәдретдинова калдырган. «Котлыйбыз», «Булдырасыз, молодцы», «Бәхетле булыгыз», – кебек матур теләкләр дә бик күп.