Җырчы ИлСаф социаль челтәрләрдә яшьли арабыздан киткән мәрхүм әтисен искә ала. Тумышы белән Чүпрәле якларыннан булган җырчы әти-әнисенә, якын итеп, «әтәй», «әнәй» дип дәшә.
«Күңелләр тулды бүген! Әтәйнең туган көне. Яшьли китте… 56 яшендә, егет чакта...
Безне укытты, өйләндерде, кеше итте дә китеп тә барды!
Әнәй, әтәйдән калып, 30 елга якын яшәде, Ходай рәхмәте белән. 6 баланы шушы заманнарда ач-ялангач итмичә үстерү, укыту, аякка бастырулары бик авыр булгандыр... Хәзер инде аңлашыла.
Урыннары оҗмах түрләрендә булсын кадерлеләребезнең», – дип язган ул.
«Уллары белән горурланып, тыныч йокласыннар»; «Бигрәкләр дә чибәр кеше булган әтиең, ИлСаф, урыны җәннәттә булсын»; «Шундый матур итеп искә алгансыз, урыннары оҗмахта булсын», – дип комментарийлар язалар җырчының сәхифәсендә дуслары.