Илсөя Бәдретдинованы Тукайдан көлүдә гаепләгәннәр
Илсөя Бәдретдинова Габдулла Тукайның «Бала белән күбәләк» шигыренә рәсем ясаган.
«Туганнан туган сеңлем беренче сыйныфта укый. Укый иде. Бу онлайн уку бик кызык. Минем малай телефонын күтәреп чәй эчә-эчә дәрестә утыра. Туганнан туган сеңлем: «Рәсем дәресеннән өй эше эшләргә», — дип көне буе минем тирәдә угалана. Кыскасы, Габдулла Тукайның берәр шигыреннән бер персонаж ясарга кирәк иде. «Бала белән күбәләк» бу, танымасагыз. Соңгы тапкыр кисточканы кайчан тотканымны да хәтерләмим инде. Ясап бетердем дә, Ясминәм егылып көлә. «Малайнын башында нинди тап ул?» — ди? Чәч. Малайларда шулай калдыралар иде бит инде. «Кәҗә» дип атала иде. Бар идеме? Языгыз инде», — дип язган җырчы.
«Вәт синдә талант! Супер малай бу! Кәҗәсе дә шәп», — дип мактаган Ләйлә Дәүләтова.
«Үзизоляция вакытында кем шундый рәсем ясый инде?» — дип шаярган җырчы Рифат Зарипов.
«Өйдә утыра торган малай турында да шигыре бар иде бит. Шуны ясарга иде. „Эш беткәч уйнарга ярый“, бугай», — дип җавап кайтарган Илсөя Бәдретдинова.
«Карантин беткәч уйнарга ярый», — дип көлгән бер инстачы.
«Безнең әни абыйның чәчен шулай алгач, абый Сабантуйга да бармады», — дип истәлеге белән уртаклашкан бер ханым.
Әлеге персонажны Элвин Грейга охшатучылар да, шундый чәчнең «под котовского», «чупчик» дигән атамаларын да искә төшерүчеләр табылган.
«Бер дә кызык түгел, кызганыч. Габдулла Тукайдан көлгән шикелле», — дип ризасызлык белдергән бер ханым.
«Уфффф, тагын нәрсә инде», — дип аптыраган җырчы.
«Өйдә ятып, ак белән караны аермый башладыгызмы әллә? Кайда монда Тукай, ничек көлгәннәр аннан?», «Апа, җаным, болай да авыр заманда көлергә ярыйдыр бит?», «Көнләшү инде, бар кеше дә рәсем ясый белми бит, ә рәсем искиткеч!» — дип яклаганнар җырчыны.