Илсөя Бәдретдинова сыерлар белән төшкән фотоларын күрсәтте.
«Кешене авылдан тартып чыгарып була, ә авыллыкны кешедән - юк», — дип язган җырчы.
Җырчының виртуаль дуслары фотолардагы сыерларны да, Илсөяне дә ошаткан.
«Авылда туып-үскәнгә шулай матур син, Илсөя. Тышкы кыяфәтең дә, эчке дөньяң да менә дигән. Ул төрле темага истәлекләр сөйләвең… Авылда үсмәгән булсаң, нәрсә сөйләр идең? Кемгә кызык ул шәһәрнең бертөрле тормышы?»;
«Үгез сөзмәсен», — дип кайгыручылар бар. «Сыерларда да ирләргә кытлык. Көтүдә үгез юк», — дип җавап язган җырчы.
Илсөянең кыюлыгына шаккатучылар да бар. «Курыкмадыгызмы?» — дип сораган алар. «Шулар койрыгына тотынып, яшьлегем узды. Бер-беребезне аңлыйбыз», - дип җавап язган җырчы.
«Сине тамашачылар гына түгел, сыерлар да ярата», «Концертлар юк, яңа һөнәр үзләштерәсеңме әллә?», «Сыерларга нинди җыр җырладың? Тезелеп басканнар тыңларга», — дип комментарийлар калдырган инстачылар.
«Авыл кешесе нишләгән? Авыллык белән шәһәрлекне ник аерасың? Илсөя, авылны мыскыл итмә, үзеңә булган хөрмәтне югалтма», — дип комментарий калдырган җырчыны аңлап бетермәгән инстачы.
