Илсөя Бәдретдинова хәзер атказанмаган түгел
Ниһаять, җырчыга Татарстанның атказанган артисты исемен биргәннәр.
Җырчы Илсөя Бәдретдиновага, ниһаять, Татарстанның атказанган артисты исеме бирелгән. Бу хакта «Ватаным Татарстан» газетасының инстаграмында язганнар.
Татар эстрадасының иң халыкчан җырчысы хәзер атказанмаган түгел! Җырчы әлеге вакыйгага карата үз фикерен: «Просто рәхмәт!» — дип әйтү белән чикләнгән. «Атказанмаган» программасы белән ни була дип сорагач: «Аның белән өч ел йөрмим ич инде. Хәзер мин «Фәрештә түгел», дип җавап биргән ул.
Күптән түгел Илсөя Бәдретдинова Болгар радиосына кунакка килгәч: «Нишлим мин ул атказанган исеме белән. Әле уйлап йөрим, бирсәләр, алмасаң да матур түгел, ул бит дәүләт бүләге, алсаң да… Ә мондый премияләр („Болгар“ радиосы премиясе) күңелемә якын. Монда бирегез дип сорап йөрергә кирәкми, документ җыярга кирәкми, мин җырчы, бирегез инде дип исбат итәргә кирәкми. Монда сез үзегез күреп, лаеклы дип табып бирәсез. Шунысы күңелгә бик рәхәт», — дип сөйләгән иде.
