Башкортстанның Стәрлебаш районының Иске Калкаш авылында Илнур Ярмөхәммәтовны соңгы юлга озатканнар. Махсус опреациядә һәлак булган якташлары турында Рөстәм Рахмангулов социаль челтәрдә хәбәр итә.
«Илнур Варис улын укытучылары, дуслары, авылдашлары әйбәт, ачык, максатчан, хезмәт сөючән буларак белә. Яшь булуына карамастан, ул авторитетлы булды. Без югалту ачысын уртаклашабыз. Ватан сакчысына баш иябез. Мәңгелек хәтер!» – дип язган район башлыгы.
Илнур Ярмөхәммәтов, һәлак булганнан соң, Батырлык ордены белән бүләкләнгән. Орденны әтисенә тапшырганнар.
«Шундый яшьләр китә. Яшәргә дә яшәргә...» – дип яза Снежана Сабирова.
«Япь-яшь егетләр әрәм булып бетәләр инде, шулхәтле йөрәк әрни», – ди Зөлфия Шәфыйкова.
Альмира Мансурова Мәҗит Гафуриның юлларын китергән: «Юктырсың ла, Алла, әгәр булсаң, чыдап тормас идең бу хәлгә. Күпме балалар әрәм була, туктатыгыз инде». Аңа Лидия Газизова «Әстәгъфирулла» дип җавап кайтарган.
Рита Зөлкарнәева: «Илнур улымны онытырлык түгел. Ул шулкадәр тырыш, уңган, кешегә гел елмаеп тора торган бала булды. Варис абыйга түземлек бирсен», – дип язган.
Фирүзә Әмирханова: «Шулкадәр авыр каравы, ә әти-әнисенә ничекләр түзәргә, нинди догалар булыша икән, кемнәр аңлатыр?» – дип яза.
Гөлфия Әюпова: «Газизләренә сабырлык бир», – дип яза.