Танылган алып баручы Илнур Фәйзрахманов социаль челтәрдәге сәхифәсендә укытучыларның бүгенге хәле турында гап-гади аңлатып биргән һәм аларны бәйрәм белән котлаган.
«Укытучы!
Бүген мин укытучыны карга бата-бата кырдан кайтучы, җилкәсенә авыр салам көлтәсе күтәргән әби-бабайга тиңлим.
Никадәр йөк бүген укытучы иңендә?!
– Баланы укыт;
– Тәртипле тәрбия бир;
– ЕГЭсына бюджет урынына керерлек балл җыярлык итеп әзерлә;
– Баланы әрләмә, хәтта кырын да карама;
– Әти-әнисе ризалык кәгазенә имза куймаса, такта сөрттермә, дежурный итеп куйма, өмәләргә алып чыкма;
– Бала сине әти-әниең, җиде буын бабаңны искә төшереп мыскыллый икән, дәшмә!
Кызганыч, илдәге мәгариф системасы, гарип демократия, чиле-пешле үзаң бүген укытучының дәрәҗәсен бик төшерде.
Укытучының да кеше икәнен онытып, юк эшне бар дип, әти-әниләр көн саен прокуратурага дистәләгән хатлар сырлый.
Илһамланып, күңелен салып балаларны укытасы урында, укытучы прокуратурадан төшкән хатка җавап биреп, гаепсезлеген исбатлап вакыт уздыра...
Өф-өф итеп иркәләп, саклап, кайгыртып (ә чынлыкта – баланы үз иркенә куеп, ни эшләсә дә, төпченмичә генә шуны хуплап) әти-әни бүген үз баласыннан җинаятьче, психикасы сәламәт булмаган адәм тәрбияли.
Баласын 60-70 мең түләп «элитный» мәктәпкә йөртүче, чынында мәктәпкә кергәндә исәнләшә дә белмәгән ата-ананың баласыннан укытучы гына ничекләр итеп Шәхес тәрбияли алсын икән?!
Хөрмәтле укытучылар! Сабырлык сезгә! Ходай сабырлык биреп, сәламәтлегегезне сакларга ярдәм итсен.
Белемгә омтылган укучылар гына түгел, адекват әти-әниләрнең дә күбрәк булуын телим», – дип язган ул.
Комментарийларда журналистка котлаулары һәм укытучының бүгенге хәлен аңлавы өчен рәхмәт белдергәннәр.