Илнур Фәйзрахманов Казандагы данлыклы шахмат мәктәбен тәнкыйтьли: «Кеше көлдермәгез инде»

Журналист Илнур Фәйзрахманов Казанның Рәшит Нәҗметдинов исемендәге шахмат мәктәбенә килеп, биредәге шартларга шаккаткан. Бу хакта ул социаль челтәрләрдә яза һәм республиканың югары органнарына мөрәҗәгать итә. 

«Мактаулы (ә бәлки – мактанчыктыр), мәгърур, мең елдан артык тарихы булган Казан үзәгендәге Рәшит Нәҗметдинов исемендәге шахмат мәктәбе бу…

Мондый урындыклар безнең түрәләрнең җиденче буын туганнарының бәрәңге базында да тормый торгандыр инде… Шахмат – спорт та, мәдәният тә, мәгариф тә. Шуңа барлык министрлыкларны да билгелим… Татарстанның мәдәният, фән, спорт министрлыклары! Кеше көлдермәгез инде… Әле, җитмәсә, Татарстанның Шахмат федерациясе дә шушында… Балалар йөри бит мәктәпкә.

Бүген беренче мәртәбә килгән 5 яшьлекләрне карап тордым. Залга килеп керүгә, бер малай ярып салды: «Мама, смотри! Стулья и столы как в бане и на даче у бабульки!»  – дип яза Илнур.