Илназ Минвәлиев туган көненә акча сорый
20 майда Татарстанның атказанган артистына 40 яшь тулды.
Татарстанның атказанган артисты Илназ Минвәлиев 20 майда 40 яшьлек юбилеен билгеләп үтте. Бу уңайдан, җырчы тузганаклар фонында төшкән фото куйган. Фотога «Мине бик каты туган көнем белән котларга теләүчеләр, моны электрон рәвештә эшли ала. Карта телефон номерына бәйле…» — дип язган.
Фотоларны сыпырып карарга мөмкин, икенче фотода бу текстның русча варианты бар, ә чираттагы фотоларда «тсс, бүген минем көн», «бүген минем бәйрәм» кебек язулар калдырган җырчы.
Инстачылар арасында «бүләк» җибәрүчеләр дә бар. Калганнар саулык, озын гомер, гаилә бәхете, улларының куанычын күрүен, уңышлар теләгән.
«2020 ел, 20 май, 20+20=40, матур саннар, бәхет кенә китерә торган булсын!», — дип тә язган игътибарлы дусты.
«Вәт оятсыз», «Сезгә дә җиңел түгел, сүз белән котласам да каршы килмәссездер», дип тә комментарий калдырганнар.