Илназ Минвәлиев Хәмдүнә Тимергалиева каберенә шортиктан килгән
Инстачылар Хәмдүнә Тимергалиеваның вафатына бер елдан артык вакыт үтсә дә, һаман таш куелмавына игътибар иткән.
Җырчы Илназ Минвәлиев Мәскәүдә яшәп иҗат итүче дусты Вәиз Хәйретдинов белән Хәмдүнә Тимергалиеваның каберен зиярат кылган. «Хәмдүнә апабыз Мәскәүгә барган чакларында Вәизләр йортына туктала, алар якын дуслар иде. Бөек шәхесләребезне хөрмәтләү — безнең бурыч», — дип язган ул инстаграмда.
Егетләр зиратка изге ният белән килгән булсалар да, аларның икесенә дә инстаграм дусларыннан шактый «эләккән». Җырчылар зиратка барганда бик кызу көн булган ахры, алар икесе дә шортиктан килгән.
«Зиратка түбәтәйсез, шортик белән кем керә инде?»;
«Мәрхүмнәр янына барганда гаурәтләр каплансын иде. Мөселман кануннары нигезендә киенеп барсак иде. Гафу итегез»;
«Илназ, мәчеткә дә шулай йөрисеңме? Син бит сәхнә кешесе, шуны да белмисеңмени?»;
«Ыштансыз зиратка кермәгез инде. Шортик ул ял итә торган, пляжларда йөри торган кием»;
«Хәмдүнә апаның каберенә баруың әйбәт, ләкин ярымшәрә килгәнсез», — дип тәнкыйтьләгәннәр аларны.
Хәмдүнә Тимергалиеваның вафатына бер елдан артык вакыт үтсә дә, һаман таш куелмавына игътибар итүчеләр дә булган. «Әле дә таш та, рәшәткә дә куелмаганмы? Менә сиңа легенда. Кеше күмеләме соң ул зиратка? Нигә анда илтеп күмелде соң ул? Бик кызганыч», — дигәннәр.