Илназ Баһ гинеколог турында җыр язуын сораучыларга: «Йон турында да җыр язарга була...»

Илназ Баһтан хатын-кыз табибларына багышланган җыр язуын сораганнар. Бу хакта ул социаль челтәрдәге «Ә син…?» тапшыруында сөйләде.

Тапшыруның алып баручысы Әбри Хәбри «йөрәк» турындагы җырлары турында сорады.

«Аңла йөрәгемне» җыры чыккач, халыкка кызыклырак итеп тәкъдим итәсе килә бит инде. Яшел Үзәнгә медицина хезмәткәрләрен һөнәри бәйрәмнәре белән котларга чакырдылар. Шунда бераз «су да кушып» кызык итеп сөйләдем инде.

«Аңла йөрәгемне» җырын башкаргач, залның бер өлешендә утыручылар алкышлады, ә икенче яртысындагылар – юк. Монда татарлар һәм руслар аерым утырган ахры, дип уйладым. Бактың исә, хикмәт анда түгел икән. Залның беренче яртысында – кардиологлар, икенчесендә гинекология бүлеге хезмәткәрләре утырган булган.

Концерттан соң кардиологлар шундый җыр өчен рәхмәт тә әйтте. «Эшкә шул җырны җырлый-җырлый барабыз һәм кайтабыз», – диделәр. Ә гинекология өлкәсендәгеләр «безнең турында да җыр яза алмассызмы соң» дип сорадылар.

Бармак, терсәк, күз, баш рифмасын китереп, йон турында да язарга була. Әлегә сезнең органнарга барып җитмәдем әле, дидем инде», – дип сөйләде ул, уены-чынын бергә кушып.

Андый җырлар безнең эстрадабызда барлыкка килмәсен инде, – диде Әбри Хәбри.

Әле шул темага җыр язып, клип төшерергә уйласак, төп рольгә сине чакырабыз, – дип җавап бирде Илназ Баһ.

Әбри Хәбриев клипта төшәргә каршы килмәде.