Җырчы Илнат Фәрхуллин быелгы сезонда концертларын узган елга караганда күпкә кимрәк куярга җыена. Ул моның сәбәбен «Күңел» радиосының туры эфирында әйтте.
«Күп вакыт үзеңне жәлләмисең. Ә кабат шул борчылулар чир булып килеп чыга. Әниләрнең: «Бөтен чир нервадан», – дип әйткәннәрен шаяруга алып йөри идек. Дөрестән дә шулай икән.
Быел минем тормышымда сөенечле моментлар да, борчулар да күп булды. Сәламәтлек белән дә проблемалар булып алды. Алар барысы да хафага сала, гел шуларны ничек җиңеп чыгарга икән дип уйланып йөри башлыйсың. Шуңа да мин быел концертларны киметергә булдым. Башка елларны аена 28әр концерт булса, быел 10-12 концерт кына куячакмын. Азрак ял итәргә, гаиләгә, үземә игътибарны арттырырга булдым», – дигән Илнат.