Җырчы Илнат Фәрхуллин 1990 елларда бик популяр булган композитор, автор-башкаручы Гайфулла Абзаловта кунакта булган. Аның: «Әллә син, әллә мин, беребез якты йолдыз», – дип җырлап йөргәнен хәтерлисездер.
«Бүген легендар композитор һәм җырчы Гайфулла Авзалов белән таныштык. Бик эчкерсез, позитив кеше. Ә нинди матур җырлар яза», – дип сөйли Илнат җырчы турында. Гайфулла Абзалов Илнат өчен махсус яңа җыр язып бүләк иткән. Бәлки, аны якын арада ишетеп тә булыр.
Гайфулла Абзалов Илнат һәм аның тормыш иптәше Регинага ничек яшәгәнен дә күрсәтә. Соңгы елларда сәхнәләрдә дә, социаль челтәрләрдә дә күренмәгән Гайфулла Абзалов шәһәр читендә үз йорты белән яшәп ята. Кунакларны ул йортының «беседкасында» кабул иткән. Биредә барлык уңайлыклар да бар. Шашлык пешерү урыннары җайланган. Зур-зур гөлләр үсеп утыра. «Кем килә, иң рәхәт җир шушында, диләр инде. Монда 30 градус салкында да җылы», – дип, сөенә-сөенә кунак иткән аларны Гайфулла Абзалов.