Татар эстрадасының бию хәрәкәтләре белән аерылып торган җырчысы Илнат Фәрхуллин социаль челтәрдәге сәхифәсендә ашарга «тәмләп» пешергәнен дә күрсәткәләп тора, рецептлары белән дә уртаклаша.
Җырчының ризык әзерләгән һәр видеосы һәркемгә таныш «күбәләк» сүзе белән тәмамлана. Бу юлы җырчы бераз үзгә видео төшергән. Ул балаларын яшелчәләр белән балык пешереп сыйлаган.
Видеодан күренгәнчә, Илнат балыкларга тоз белән «массаж» ясый. Аннары яшелчәләр өстенә салып, духовкага куя.
Ахырдан триодан (җырчы, кызы, улы) «күбәләк» сүзе күпләрнең күңеленә хуш килгән. «Чын күбәләкләр инде, минем матурларым», «Илнат «ут», «Бигрәк тәмле күренә», «Яратам инде» кебек комментарийлар язганнар.
Видеоны игътибар белән караган бер кеше «матур итеп киселгән анар (гранат) кая китте» дип кызыксынган.