Илнар Сәйфиевнең хатыны Ләйсән: «Балаларыбызны бик озак, газапланып, ялварып көттек»
Җырчы Илнар Сәйфиевнең тормыш иптәше Ләйсән косметика өлкәсендә үзенең яңа эшен башлап җибәргән.
Ләйсән һәм Илнар Сәйфиевләр балалары Ләйлә, Аяз һәм Айзиләне үстерәләр.
«Вакыты җиткәндер. Әйдәгез танышыйк?! Минем исемем Ләйсән, миңа 29 яшь. 10 ел элек яраткан ирем янына Татарстанның башкаласы — Казанга күчеп килдем. Озак еллар көтелгән, газапланып, ялварып сораган өч баламның әнисе мин.
Банкта эшләдем, үрләргә менү дә, егылулар да булды. Нәтиҗәдә, мин бу һөнәремнән бик ардым. Банк эшчеләре мине аңлар дип уйлыйм. Декрет ялына китү теләгем бик көчле иде. Тик бу мизгел өч ел буена килмәде…
Хастаханә юлларын таптаулар... Инде өметемне югалттым гына дигәндә, барысы да килеп чыкты. Мин йөкле, шатлык тулы күз яшьләре. Декрет ялына киткәндә банкка кире кайтмыйм дип сүз бирдем. Һәм менә үземә ошый торган, яраткан эшем белән шөгыльләнә башладым», — дип язган Ләйсән Сәйфиева.
